Mellorar o Estudo paso a paso

 

No Colexio Plurilingüe Padre Feijoo-Zorelle seguimos traballando para facilitar ao noso alumnado ferramentas reais que lles axuden a estudar mellor e afrontar os exames con máis seguridade. Por iso, preparamos unha presentación chea de estratexias prácticas e moi doadas de aplicar no día a día 

O obxectivo é claro: estudar non é memorizar sen parar, senón aprender a organizarse, comprender e practicar. Con pequenos cambios, os resultados melloran de forma sorprendente.

Ao longo da presentación abordamos cuestións fundamentais como:

📌 Como organizar un horario de estudo eficaz

Un bo horario reduce estrés, axuda a ser constante e permite equilibrar estudo e tempo libre. Ademais, incluímos pautas claras para establecer rutinas realistas e sostibles.

🧠 Como crear e utilizar mapas mentais

Explicamos que son, como se constrúen e por que son unha ferramenta visual tan útil para comprender e lembrar contidos de maneira rápida.

🖍 A importancia de subliñar ben

Mostramos boas prácticas para destacar só o esencial, con exemplos de trazos e símbolos que axudan a estruturar a información.

📝 Como tomar apuntes que realmente axudan

Nas diapositivas detallamos que tomar apuntes non é copiar, senón escoitar, seleccionar e sintetizar, ademais de organizar a información con títulos, marxes e códigos visuais.

⏳ Técnica Pomodoro: estudar en ciclos

Explicamos en que consiste, como funciona e por que é tan eficaz para manter o foco e evitar a fatiga mental.

🧩 A práctica como clave da aprendizaxe

Propoñemos formas de poñer en marcha exercicios e exemplos para consolidar a teoría.

🗣 Explicar o aprendido para reforzalo

Cando un alumno é capaz de explicar algo con palabras sinxelas, realmente interiorizou o contido.

📇 Uso de tarxetas de memoria (flashcards)

Recomendamos esta técnica rápida e versátil, ideal para vocabulario, definicións, datas e fórmulas.

💬 Se precisas resolver algunha dúbida ou queres mellorar o teu método de estudo, podes contactar coa orientadora do centro.

A túa Casiña de Nadal feita con maxia… e refugallo!

 

O noso colexio está cheo de ilusión porque… voltamos a celebrar un dos concursos máis máxicos do ano! 

Este Nadal convidamos a todo o alumnado a participar na creación das súas propias casiñas de Nadal feitas con materiais de refugallo, un reto creativo e sostible que encherá o centro de luz, cor e fantasía.

Queremos demostrar que, con imaxinación e respecto polo planeta, os materiais máis simples poden transformarse en auténticas xoias artísticas. Caixiñas, cartón, plásticos, papeis… todo pode cobrar vida e converterse nun pequeno fogar cheo de maxia.

📅 Datas importantes:

— 12 de decembro: data máxima de entrega

— 15 de decembro: votacións do equipo docente e das familias

— 18 de decembro: entrega de premios

🧰 Requisitos para participar:

— Ser alumno ou alumna do noso colexio

— Empregar materiais de refugallo

— Cumprir o prazo de entrega

— Altura mínima: 30 cm · Altura máxima: 1 m

— E, por riba de todo… botarlle moita imaxinación! ✨

Estamos desexando ver como cada neno e cada nena dá vida a unha casiña única, soñadora e chea de espírito de Nadal. 

Pequenas creacións que, xuntas, converterán o noso colexio nun espazo aínda máis especial nestas festas.

 Animádevos a participar!

Que as vosas casiñas, feitas con creatividade, reciclaxe e corazón, iluminen o Nadal no Colexio Plurilingüe Padre Feijoo-Zorelle.

25N · Compromiso educativo contra as violencias machistas

No marco do noso compromiso coa prevención das violencias machistas, nos últimos días enchemos o centro con carteis inspiradores que convidan a pensar, sentir e sensibilizarse. Pezas cheas de mensaxe que nos lembran a importancia de construír vínculos respectuosos e de cultivar o bo trato cada día.

Ademais, na nosa biblioteca escolar preparamos unha pequena selección especial de lecturas sobre igualdade e prevención da violencia de xénero, que permanecerá exposta durante unha semana para a súa consulta. Un espazo pensado para que profesorado e alumnado poidan achegarse a historias, voces e reflexións que axudan a comprender, cuestionar e transformar.

Hoxe, o profesorado luciu lazos morados, símbolo internacional de loita contra a violencia de xénero. Un xesto sinxelo pero cargado de significado: apoio ás vítimas, rexeitamento de calquera forma de violencia e un compromiso firme coas relacións baseadas no respecto e na igualdade.

Son accións pequenas, pero imprescindibles, que fortalecen unha escola máis consciente, segura e humana.

Porque educar en igualdade non é só ensinar: 

é acompañar, abrir ollos e sementar futuro.

25N · Construíndo pensamento crítico fronte á violencia de xénero

Onte, no noso centro, o alumnado de 4º ESO participou nun obradoiro moi especial impartido por Xisela, profesional de CIMO, dentro do programa  de Red Araña.

O obxectivo principal desta sesión foi comprender que é realmente a violencia de xénero, desmontando mitos e identificando aquelas condutas que, aínda que ás veces pasan desapercibidas, forman parte dunha relación desigual ou daniña.

A actividade estivo guiada a través da lectura do libro El amor no maltrata, da psicóloga Olga Barroso Braojos, un recurso que permite abordar con claridade que comportamentos nunca deben normalizarse nunha relación afectiva. Tras a reflexión colectiva, o alumnado puido compartir impresións, dúbidas e ideas nun ambiente seguro e respectuoso.

Como parte do obradoiro, todo o alumnado de 4º ESO foi agasallado cun exemplar do libro, facilitando así unha lectura crítica e individual que lles axude a identificar sinais de alarma e a promover relacións baseadas na igualdade e o respecto.

Actividades como esta contribúen a formar unha mocidade máis consciente, empática e preparada para rexeitar calquera forma de violencia.

 Porque unha sociedade libre comeza con relacións que respectan.

25N · Día Internacional contra a Violencia de Xénero

Tendo en conta que maña é o Día internacional contra as violencias machistas, hoxe no noso centro educativo, recordamos que a violencia de xénero non aparece só en formas visibles: tamén pode comezar con control, comentarios que fan dano ou relacións pouco respectuosas. 

Por iso, o 25N é unha oportunidade para educar en igualdade, falar de relacións sanas e fomentar valores como o respecto, o coidado mutuo e o bo trato.

Con esta idea, e coa guía de Lucía, a nosa mestra especialista en audición e linguaxe, o alumnado de Infantil e Primaria colaborou  na creación dun mural que leva por lema “Quererse é coidarse”. 

A través do traballo artístico e da reflexión en grupo, falamos sobre como debemos tratarnos, como identificar comportamentos que non son adecuados e por que coidar das persoas tamén significa coidar de nós mesmas e nós mesmos.

Pequenas accións como esta axudan a construír unha escola máis segura, empática e igualitaria.

Porque educar en igualdade é sementar futuro.

Xuntas e xuntos, sempre máis fortes.

 Hoxe conmemórase o Día Mundial da Saúde Mental, unha data que nos lembra a importancia de falar abertamente do que, durante moito tempo, foi un tema cheo de silencios e prexuízos. A saúde mental forma parte esencial do benestar global das persoas: inflúe na maneira en que pensamos, sentimos, nos relacionamos e afrontamos os retos da vida cotiá.

Co obxectivo de visibilizar e sensibilizar, o alumnado de 4º de ESO B e da Unidade de Educación Especial participou nunha actividade simbólica e chea de valor educativo: coloreamos cerebros. A proposta partía dunha idea sinxela pero fundamental: non existen dous cerebros iguais, porque cada persoa posúe unha forma única de procesar o mundo, de aprender e de sentir.

Esta experiencia converteuse nun mural colectivo, que pode verse nos corredores do colexio, e que representa a diversidade mental a través da cor, a creatividade e a reflexión. Baixo cada cerebro coloreado, o público pode descubrir un pequeno resumo sobre diferentes trastornos mentais, elaborado co propósito de informar, concienciar e promover a psicoeducación entre o alumnado.

A psicoeducación é unha ferramenta clave para a prevención e a detección temperá. Cando nenas, nenos e adolescentes comprenden que existen distintos trastornos, que todos podemos precisar axuda nalgún momento e que pedir apoio non é un signo de debilidade senón de responsabilidade, estamos educando persoas máis empáticas, seguras e libres de estigmas.

No noso colexio apostamos firmemente por cumprir con esta responsabilidade, fomentando espazos de reflexión, convivencia e coidado emocional. O Departamento de Orientación mantén as súas portas abertas para asesorar, acompañar e ofrecer apoio ao alumnado, profesorado e familias en todo o relacionado coa saúde mental e o benestar persoal.

Neste 10 de outubro, o noso centro súmase á conmemoración cunha mensaxe clara e necesaria:

“Coidar a saúde mental é cousa de TOD@S”

Porque falar de saúde mental é falar de educación, de inclusión e de futuro.

Diversidade e lexislación: pechamos o seminario cunha mirada sostida cara á inclusión

Ao longo deste curso escolar desenvolveuse no noso centro o seminario Afondando na atención á diversidade, unha proposta formativa dirixida ao profesorado e coordinada pola orientadora educativa do centro, Ana Conde. O obxectivo principal foi avanzar colectivamente na construción dunha escola inclusiva, reflexionando sobre as respostas educativas que podemos ofrecer desde o marco normativo e pedagóxico vixente.

Fai unhas semanas celebramos a última das sesións formativas deste seminario, baixo o título Diversidade e lexislación: un marco para a inclusión. Nesta ocasión, afondamos nos fundamentos legais que sustentan a atención á diversidade no sistema educativo galego, facendo un percorrido polos aspectos máis relevantes da normativa que regula os currículos nas distintas etapas educativas.

Ademais, analizamos medidas ordinarias e específicas de atención á diversidade e como estas poden implementarse de maneira eficaz nas aulas, garantindo a equidade e a resposta axeitada ás necesidades de todo o alumnado. Un dos puntos clave foi a presentación do Programa de acollida ao alumnado estranxeiro da Consellería, unha ferramenta fundamental para favorecer a integración lingüística, cultural e académica do alumnado recentemente incorporado ao noso sistema educativo.

Tamén se abordaron protocolos oficiais da Xunta de Galicia relacionados coa atención ao alumnado con necesidades específicas de apoio educativo (NEAE), destacando a importancia de coñecelos e aplicalos de xeito coherente e coordinado.

A participación activa do profesorado e o seu interese por mellorar a práctica docente desde a mirada inclusiva foi, sen dúbida, unha constante ao longo do seminario. Esta última sesión serviu como peche e como impulso renovado para seguir avanzando, con coñecemento e compromiso, na tarefa de garantir unha educación de calidade para todas e todos.

Porque formar(nos) é tamén incluír.

Axudas NEAE 2025-2026: Información clave para as familias

O Ministerio de Educación convocou as Axudas para alumnos/as con Necesidades Específicas de Apoio Educativo (NEAE) para o curso 2025-2026. 

Queremos explicarvos de forma clara en que consisten, quen pode solicitalas e por que son importantes.

✅ Que son estas axudas?

Son axudas económicas dirixidas a alumnado que presenta necesidades específicas de apoio educativo (NEAE). Buscan facilitar o acceso á educación en igualdade de condicións, reducindo barreiras relacionadas co custo de ensinanzas, transporte, comedor, material, reeducación pedagóxica e lingüística, entre outros.

👧👦 Quen pode solicitalas?

No noso centro poden solicitalas os alumnos/as que:

• Teñan cumpridos 2 anos antes do 31/12/2024.

• Estean matriculados en Educación Infantil, Primaria ou ESO.

• Presenten algunha das seguintes necesidades:

  • Discapacidade cun certificado igual ou superior ao 25%.

  • Trastorno do Espectro do Autismo (TEA).

  • Trastornos Graves de Conduta (TGC).

  • Trastornos graves da comunicación e da linguaxe.

  • TDAH asociado a discapacidade ou TGC.

  • Altas Capacidades Intelectuais.

💬 Que gastos cobren?

As axudas poden cubrir:

• Ensinanzas

• Transporte

• Comedor escolar

• Residencia escolar

• Libros e material didáctico

• Reeducación pedagóxica e da linguaxe

• Subsidio de contía fixa

📝 Como solicitar a axuda?

A solicitude faise en liña:

• www.educacionyfp.gob.es

• https://sede.educacion.gob.es

É importante preparar toda a documentación (certificados médicos, informes psicopedagóxicos, etc.) con tempo.

⏰ Cales son os prazos?

O prazo vai do 30 de abril ao 11 de setembro de 2025. Recoméndase non esperar ao último momento para evitar problemas técnicos ou de documentación.

💡 Por que son importantes estas axudas?

Porque contribúen a que todos os nenos e nenas poidan recibir a educación que necesitan, contando cos apoios e recursos axeitados para o seu desenvolvemento persoal e académico.

Se precisades axuda para tramitar a solicitude ou tedes dúbidas sobre se vos corresponde, podedes contactar coa orientación educativa do centro. Estamos aquí para acompañarvos neste proceso.

CONSTRUÍNDO UNHA CASA SEN ACOSO

 No marco do Festival do Libro, abrimos no noso centro unha xanela especial: a exposición “Lecturas que abrazan: Construíndo unha casa sen acoso”, unha proposta que recolle o froito do traballo lector desenvolvido nas aulas co acompañamento do Departamento de Orientación e do equipo docente.

Esta casa simbólica construíuse cos seguintes piares:

📖 Os libros:

• Orellas de bolboreta, de Luisa Aguilar e ilustrado por André Neves, invitounos a falar de autoestima, aceptación e da beleza da diversidade.

• El cazo de Lorenzo, de Isabelle Carrier, achegou ao alumnado unha metáfora visual e poderosa sobre as dificultades, a inclusión e a importancia da empatía.

• Subnormal: unha historia de acoso escolar, cómic baseado na experiencia real de Iñaki Zubizarreta, con guión de Fernando Llor e ilustracións de Miguel Porto, permitiu ao alumnado de ESO afondar nunha historia impactante sobre o acoso, a dor e a capacidade de superación.

🎨 As creacións do alumnado:

• Bolboretas decorativas elaboradas polo alumnado de Infantil, que simbolizan a transformación e a liberdade de ser un mesmo.

• Cazos de barro e de cartón realizados en Primaria, que nos falan de cargar coas diferenzas con orgullo e da importancia de apoiar quen o precisa.

• Cómics elaborados en Canva polo alumnado de ESO, que recollen as súas propias reflexións sobre o acoso escolar e o valor da palabra como ferramenta de denuncia e transformación.

📘 Tamén para quen educa: un libro que acompaña o profesorado

A exposición “Lecturas que abrazan” inclúe tamén unha proposta pensada especialmente para o profesorado: o libro Lectura y acoso escolar. Propuestas para la mejora de la convivencia (Editorial Narcea, 2022). Esta obra recolle contos e historias acompañadas de propostas didácticas que axudan a tratar na aula temas fundamentais como o respecto, a empatía ou a resolución pacífica de conflitos. É unha ferramenta valiosa para repensar a práctica docente, fomentar o pensamento crítico e impulsar dinámicas de aula que promovan a convivencia desde a lectura.

🏡 A metáfora da casa:
O espazo expositivo reinterpreta unha casa como lugar de acollida, coidado e seguridade. As bolboretas adornan as paredes, os cazos penduran coma se fosen recordos que nos convidan a non esquecer, e os libros están no centro, porque é a través deles que nos achegamos ao outro con empatía.

Esta iniciativa non sería posible sen o apoio da nosa biblioteca escolar e da súa coordinadora, que transformaron un recuncho do colexio nun espazo de reflexión compartida.

Desde o Departamento de Orientación, agradecemos a implicación de todo o profesorado participante, que fixo da lectura unha ferramenta para construír conciencia, emoción e convivencia.

Anímate a visitar a exposición no corredor principal do centro. 

Porque educar tamén é decorar con sentido. 

Porque ler tamén é abrazar.

LECTURAS QUE ABRAZAN

Con motivo do Festival do Libro, desde o Departamento de Orientación do noso centro organizamos unha serie de propostas co obxectivo de fomentar a lectura como ferramenta para traballar valores fundamentais como a empatía, a autoestima, a aceptación das diferenzas e a prevención do acoso escolar. Estas actividades non serían posibles sen o apoio imprescindible da nosa biblioteca escolar e da súa coordinadora, que, unha vez máis, puxeron ao servizo da comunidade educativa un espazo de encontro, reflexión e creatividade.

O alumnado de 6º de Educación Infantil participou nun contacontos baseado no libro Orellas de bolboreta, levado a cabo pola nosa especialista en Pedagoxía Terapéutica, Isabel Cachaldora. A través desta fermosa historia, traballouse a aceptación das diferenzas, a autoestima e a empatía como ferramentas clave para combater o acoso escolar e fomentar o respecto polos demais. Como actividade final, o alumnado elaborou bolboretas decorativas, que se integrarán proximamente na exposición colectiva “Lecturas que abrazan: Construíndo unha casa sen acoso”.

O alumnado de 1º de Educación Primaria participou nunha actividade desenvolvida pola nosa especialista en Audición e Linguaxe, Eva Rodríguez, arredor do conto El cazo de Lorenzo. Comezouse cunha lectura guiada e o visionado do vídeo animado, seguido dun espazo de reflexión grupal sobre a empatía, a inclusión e a importancia da axuda mutua. Finalmente, o alumnado elaborou cazos de barro personalizados, que se incorporarán nunha segunda fase á exposición.

O alumnado de 4º de Educación Primaria participou nunha actividade deseñada e desenvolvida polo noso especialista en Pedagoxía Terapéutica, Alberto Blanco, tamén baseada no conto El cazo de Lorenzo. Tras a lectura e o visionado do vídeo, o grupo participou nunha reflexión compartida e elaborou cazos de cartón con mensaxes de apoio e solidariedade, que se integrarán igualmente na exposición “Lecturas que abrazan: Construíndo unha casa sen acoso”.

Por último, co alumnado de 2º da ESO, desenvolveuse unha actividade incluída nun programa de sensibilización sobre o acoso escolar, coordinada pola orientadora educativa do centro, Ana Conde. A proposta estruturouse en varias fases: unha introdución á temática do acoso escolar mediante unha presentación inicial, o visionado dun vídeo coa testemuña de Iñaki Zubizarreta, a lectura guiada do cómic Subnormal: unha historia de acoso escolar e unha reflexión grupal a partir de preguntas semiestruturadas. Como produto final, o alumnado elaborou cómics explicativos coa ferramenta Canva, que se sumarán á exposición común.

Desde o Departamento de Orientación, agardamos que esta exposición sexa ben acollida pola comunidade educativa e, sobre todo, que contribúa a construír un contexto máis consciente e sensibilizado fronte á realidade do acoso escolar.

Porque só desde o respecto, a empatía e a palabra compartida podemos construír escolas nas que todas as persoas se sintan seguras, queridas e escoitadas.

A boa convivencia non se impón: cultívase con coidado, día a día, entre todas e todos.

Obradoiros creativos no comedor: espazos para crear, colaborar e medrar

No noso colexio entendemos o tempo de comedor como unha oportunidade educativa máis, un espazo no que seguir aprendendo dende o xogo, a creación e a convivencia.

Estas semanas estamos a desenvolver obradoiros nos que as protagonistas son as pulseiras feitas con gomas de cores. Unha actividade aparentemente sinxela, pero con gran valor pedagóxico: as nenas e nenos traballan a súa creatividade, experimentan con formas e combinacións cromáticas, e desenvolven a súa psicomotricidade fina, fundamental para habilidades como a escritura ou o manexo de utensilios.

O traballo en grupos colaborativos é outro dos piares destas sesións: aprender a escoitar, propoñer, axudarse e valorar as achegas das demais persoas son competencias sociais imprescindibles que reforzamos a través de dinámicas cooperativas.

Dende o ámbito educativo apostamos por actividades que conecten coa súa motivación e lles permitan expresarse, tomar decisións e, sobre todo, gozar mentres aprenden. Porque cada momento do día pode ser unha oportunidade para educar.

O noso compromiso co TEA: educar para incluír!

Cada 2 de abril conmemórase o Día Mundial da Concienciación sobre o Autismo, unha data clave para dar visibilidade ás persoas con Trastorno do Espectro do Autismo (TEA) e lembrar a importancia de construír contornos educativos verdadeiramente inclusivos.

Dende o ámbito escolar temos un papel fundamental: educar na comprensión, no respecto e na empatía, valores esenciais para que o noso alumnado medre nunha sociedade que recoñeza a diversidade como unha riqueza, e non como unha barreira.

Sensibilizar sobre o autismo non só beneficia o alumnado con TEA. Tamén axuda o resto do grupo a desenvolver competencias emocionais, sociais e éticas que melloran a convivencia e fortalecen a cohesión da comunidade educativa. 

Conmemorar este día non é unha actividade puntual, senón unha maneira de reforzar o noso compromiso cunha educación inclusiva, equitativa e con sentido.

Desde as etapas máis temperás ata a adolescencia, podemos adaptar as mensaxes e actividades para que todo o alumnado entenda que:

• Non todas as persoas aprendemos do mesmo xeito.

• Todas precisamos sentirnos aceptadas, valoradas e acompañadas.

• A diferenza non nos separa: enriquécenos.

Ademais de todas estas reflexións, desde o Departamento de Orientación levamos a cabo diversas iniciativas para achegar o TEA a toda a comunidade educativa:

• Difundimos propostas de actividades para traballar na acción titorial, adaptadas a cada etapa educativa.

• Visitamos a biblioteca do centro, onde atopamos unha ampla selección de libros que abordan o autismo desde diferentes perspectivas e para todas as idades.

• Participamos nunha actividade simbólica pintando as mans de azul, como xesto de apoio, sensibilización e concienciación.

Porque a educación inclusiva constrúese cada día, con pequenos xestos que deixan grandes pegadas!

SEMINARIO: AFONDANDO NA ATENCIÓN Á DIVERSIDADE

 

Dende o noso colexio, e no marco doutras accións formativas, estamos a desenvolver o seminario Afondando na atención á diversidade, unha proposta que ten como finalidade mellorar a nosa competencia inclusiva e reforzar a nosa capacidade para ofrecer unha resposta educativa cada vez máis axustada ás necesidades do noso alumnado. O obxectivo é claro: dotar ao profesorado de información, ferramentas e recursos que lle permitan avanzar cara a unha educación máis equitativa, flexible e respectuosa coa diversidade.

Nas últimas semanas tivemos a sorte de contar con dúas sesións formativas especialmente enriquecedoras. Por unha banda, celebramos unha formación sobre DUA 3.0, titulada Deseño universal para unha aprendizaxe inclusiva, da man da nosa profesora de Pedagoxía Terapéutica Isabel Cachaldora. 

Nesta sesión afondamos nas novidades que presenta esta actualización do modelo, e exploramos mecanismos para facer realidade a súa aplicación no noso centro. 

Analizamos prácticas educativas que xa están a desenvolverse baixo esta perspectiva e coñecemos novas propostas para seguir avanzando nunha aprendizaxe accesible para todo o alumnado. O DUA constitúe un enfoque esencial para construír contornas educativas que eliminen barreiras e garantan a igualdade de oportunidades no acceso ao coñecemento.

Por outra banda, onte tivo lugar unha nova sesión, impartida polo Centro Marlau de Ourense, a cargo de dúas grandes profesionais: Laura G. Barreiros, Educadora Social, e Marta Dios Moreno, Psicóloga Sanitaria. 

Nesta formación abordáronse as características das persoas con TEA, prestando especial atención ao seu estilo de aprendizaxe e ás claves dunha intervención educativa axeitada e centrada na persoa. 

Foi unha achega de gran valor que nos permitiu seguir mellorando na comprensión e no acompañamento do noso alumnado con trastorno do espectro autista.

Consideramos un privilexio contar coa experiencia e o saber destas tres profesionais, que con tanta xenerosidade compartiron coñecemento e reflexións co noso equipo docente.

GRAZAS!