Bolsas NEAE 2026-202

Queridas familias:

Xa está publicada a convocatoria das Bolsas NEAE para o curso 2026-2027, dirixidas ao alumnado con necesidade específica de apoio educativo. Estas axudas teñen como finalidade colaborar con determinados gastos vinculados á escolarización, á atención educativa específica ou á participación en programas complementarios, segundo a situación de cada alumno ou alumna.

Quen pode solicitalas?

Poden solicitar estas bolsas as familias do alumnado que presente necesidade específica de apoio educativo asociada a algunha destas situacións:

• Discapacidade, con certificado igual ou superior ao 25%.
• Trastorno do Espectro do Autismo (TEA).
• Trastornos Graves de Conduta (TGC).
• Trastornos graves da comunicación e da linguaxe.
• Trastorno por Déficit de Atención e Hiperactividade (TDAH), cando este se asocie a discapacidade, TGC ou trastorno grave da comunicación e da linguaxe.
• Altas Capacidades Intelectuais.

Que tipo de axudas se poden solicitar?

A convocatoria contempla diferentes conceptos de axuda, entre eles:

• Ensino.
• Transporte urbano ou interurbano.
• Comedor escolar.
• Residencia escolar.
• Libros e material didáctico.
• Reeducación pedagóxica.
• Reeducación da linguaxe.
• Subsidio fixo para gastos adicionais de carácter xeral.
• Programas específicos para alumnado con altas capacidades intelectuais.

É importante lembrar que non todas as axudas corresponden en todos os casos. A concesión dependerá da situación persoal, familiar, educativa e económica do alumno ou alumna, así como da documentación presentada.

Prazo de solicitude

O prazo ordinario para presentar a solicitude será:

Do 19 de maio de 2026 ás 8:00 h ata o 10 de setembro de 2026 ás 15:00 h.

Só poderán admitirse solicitudes fóra dese prazo cando a necesidade xurda con posterioridade, estea debidamente acreditada e non admita demora. Nestes casos, a data límite será o 31 de xaneiro de 2027.

Como se solicitan?

A solicitude debe realizarse preferentemente de forma telemática, a través da sede electrónica do Ministerio de Educación, Formación Profesional e Deportes. Unha vez cuberta, deberá ser asinada e enviada polo procedemento establecido. É moi importante gardar o resgardo de presentación, xa que serve como xustificante de que a solicitude foi presentada correctamente.

Desde o centro animamos ás familias que consideren que poden cumprir os requisitos a revisar a convocatoria con calma e iniciar o trámite dentro do prazo establecido. Ante calquera dúbida, poden contactar co Departamento de Orientación, desde onde se poderá orientar no proceso e informar sobre a documentación que debe constar no expediente educativo.

Katorce18: educar na responsabilidade para previr o acoso escolar

O pasado 2 de maio conmemorouse o Día Internacional contra o Acoso Escolar, unha data que nos lembra a importancia de seguir traballando, desde os centros educativos, na prevención, sensibilización e detección de calquera situación que poida afectar á convivencia e ao benestar do alumnado.

No noso centro mantemos unha postura clara de tolerancia cero fronte ao acoso escolar, promovendo cada curso diferentes accións encamiñadas á educación en valores, ao respecto á diversidade, á empatía, á responsabilidade individual e á creación dun clima escolar seguro e positivo.

Entre as distintas campañas de sensibilización que desenvolvemos ao longo do curso, este ano volvemos participar no programa Katorce18, unha iniciativa orientada a informar e concienciar a mocidade sobre a Lei do Menor, as responsabilidades legais derivadas das propias condutas e a importancia de actuar de maneira responsable e respectuosa.

Nesta ocasión, o alumnado de 1º de ESO participou nunha charla centrada na prevención do acoso escolar, na que se abordaron situacións que poden aparecer na convivencia diaria, as súas consecuencias e a importancia de saber identificar, previr e actuar ante posibles casos de acoso.

Así mesmo, o alumnado de 2º de ESO asistiu a unha sesión sobre condutas infractoras, na que se traballou a toma de conciencia sobre determinadas actuacións, as súas posibles repercusións e a necesidade de asumir unha conduta responsable tanto dentro como fóra do ámbito escolar.

Estas sesións favoreceron a reflexión e o diálogo co alumnado arredor da convivencia, o respecto, a empatía e a responsabilidade individual. Desde o centro seguiremos impulsando iniciativas que contribúan á prevención do acoso escolar e á construción dun espazo educativo seguro, inclusivo e respectuoso para todos e todas.

Porque o acoso escolar non é cousa de nenos nin un conflito menor: é unha forma de violencia que dana profundamente a quen a sofre e interpela a toda a comunidade educativa. 

Educar na empatía, no respecto e na responsabilidade compartida é o camiño para construír centros nos que ninguén teña medo de ser quen é.

Entre páxinas e emocións: unha proposta para sentir, pensar e crear

 No marco do XVIII Festival do Libro do noso centro, desde o Departamento de Orientación desenvolvemos o proxecto Entre páxinas e emocións, unha proposta que nace coa finalidade de achegar o alumnado ao coñecemento, comprensión e expresión das emocións a través da lectura, a reflexión compartida e a creación artística.

Esta iniciativa foi impulsada pola orientadora do centro e a mestra de Pedagoxía Terapéutica da aula UEE, en colaboración co profesor da materia de Educación Plástica, Visual e Audiovisual de 3º de ESO, integrándose como unha experiencia de infusión curricular nesta materia. O proxecto estruturouse en tres grandes partes, desenvolvidas ao longo de varias sesións de traballo.

Nunha primeira parte, partiuse da rutina de pensamento “Conversa en papel”, unha dinámica que permitiu ao alumnado de 3º de ESO reflexionar de maneira guiada sobre cuestións fundamentais: que son as emocións, como se manifestan, que función teñen nas nosas vidas e que coñecementos previos posuían sobre elas. Esta proposta favoreceu a activación de ideas, a participación de todo o grupo e a construción compartida do pensamento.

A segunda parte centrouse no traballo de investigación cooperativa, no que o alumnado, organizado en pequenos grupos, puido profundar nos distintos tipos de emocións a partir de bibliografía especializada, das tarxetas das emocións de Samma Sati e de diversas páxinas web de carácter educativo. Esta fase permitiu ampliar coñecementos, incorporar vocabulario emocional e avanzar na identificación, comprensión e expresión dos estados afectivos.

Cómpre destacar o valor das tarxetas das emocións de Samma Sati como recurso facilitador deste proceso, xa que constitúen un material visual e accesible pensado para axudar á infancia a identificar, nomear e comprender o que sente dun xeito sinxelo e atractivo. Elaboradas co asesoramento de profesionais da psicoloxía e da crianza, convertéronse nun apoio de grande utilidade para promover a educación emocional e enriquecer o traballo desenvolvido na aula.

Finalmente, a terceira parte do proxecto orientouse cara á creación artística, coa realización de láminas creativas sobre diferentes emocións, inspiradas no universo visual e expresivo de Anna Llenas. A partir do traballo previo de reflexión e investigación, o alumnado transformou as aprendizaxes en producións plásticas cargadas de sensibilidade, cor e significado.

A obra de Anna Llenas, e de maneira especial O diario das emocións, serviunos como fonte de inspiración para entender que educar as emocións tamén é ofrecer espazos para nomealas, expresalas e darlles valor. Neste sentido, o proxecto permitiu conectar literatura, arte e educación emocional nunha experiencia de aprendizaxe rica e significativa.

Con Entre páxinas e emocións, o XVIII Festival do Libro convértese nunha oportunidade para seguir construíndo escola desde unha mirada inclusiva, sensible e integral, onde ler, crear e sentir forman parte dun mesmo camiño educativo.

APRENDENDO CON AGADIX

A pasada semana, no marco do noso Seminario Anual de Atención á Diversidade, tivemos a oportunidade de vivir unha experiencia formativa especialmente enriquecedora grazas á colaboración da asociación Asociación Galega de Dislexia (AGADIX). Tivemos a enorme sorte de contar coa presenza de Esther López Carbajales, médica especialista en Medicina Familiar e Comunitaria e presidenta da entidade, quen nos ofreceu unha intervención clara, rigorosa e profundamente humana arredor da dislexia.

Ao longo da súa exposición, Esther axudounos a comprender con maior profundidade que significa realmente ter dislexia, desmontando mitos aínda moi presentes e achegándonos á realidade que viven moitos nenos e nenas no seu día a día. Falounos das dificultades específicas asociadas á lectura e á escritura, pero tamén das implicacións emocionais, académicas e sociais que poden aparecer cando estas dificultades non son comprendidas ou atendidas axeitadamente.

A charla permitiunos reflexionar sobre algo fundamental: a dislexia non define a capacidade nin o potencial do alumnado, pero si require unha mirada educativa informada, sensible e comprometida. Neste senso, abordáronse tamén diversas medidas e intervencións que o profesorado pode implementar no contexto educativo, orientadas a favorecer a accesibilidade á aprendizaxe, reducir barreiras e potenciar as fortalezas do alumnado con dislexia.

Foi, sen dúbida, un encontro que nos lembrou a importancia de seguir avanzando cara a unha escola verdadeiramente inclusiva, na que cada alumno e cada alumna poidan aprender segundo as súas necesidades e posibilidades.

Desde o Departamento de Orientación queremos tamén animar ás familias que teñan fillos ou fillas con dislexia, ou que sospeiten que poidan presentar dificultades deste tipo, a coñecer e contactar con AGADIX. Esta asociación galega realiza un labor extraordinario de acompañamento, información e apoio ás familias e aos centros educativos, ofrecendo recursos de grande utilidade para comprender mellor esta realidade.

Podedes coñecer máis sobre o seu traballo e os servizos que ofrecen na súa páxina web:

https://agadix.es/es-es/

Porque comprender é o primeiro paso para apoiar, e só desde o coñecemento podemos construír contornos educativos máis xustos, inclusivos e respectuosos coa diversidade de todas as persoas que aprenden. 

COMER CON COCO

 ¿É o mesmo alimentarse que nutrirse? 

Esta foi unha das preguntas que guiou a sesión desenvolvida esta semana no marco do Plan Vixía co alumnado de 3º ESO, da man de Alfonso, nutricionista e dietista, quen nos axudou a reflexionar sobre a importancia dos hábitos saudables nesta etapa da adolescencia.

Ao longo da charla abordáronse contidos clave relacionados coa nutrición desde unha perspectiva práctica e próxima á realidade do alumnado. Falamos dos distintos tipos de dietas (hipocalóricas, normocalóricas e hipercalóricas) e de como poden influír no corpo segundo as necesidades de cada persoa. A través do “semáforo das graxas”, aprendemos a identificar cales priorizar e cales limitar, así como a importancia das proteínas e as súas fontes, incluíndo alternativas vexetais para dietas veganas.

Tamén houbo espazo para lembrar o papel fundamental dos hidratos de carbono e dos micronutrientes como fonte de enerxía diaria, comprendendo mellor a función das vitaminas no noso organismo. Como peche da sesión, puxemos o foco en que a saúde vai máis alá do prato: o xeito de cociñar os alimentos, o equilibrio emocional e os hábitos de vida saudables son pezas clave para o benestar integral.

Desde o Departamento de Orientación seguimos apostando por intervencións preventivas que axuden ao alumnado a tomar decisións informadas, desenvolver pensamento crítico e construír unha relación respectuosa co seu propio coidado.

Círculo de diálogo co Programa Vixía: falando, escoitando e medrando xuntos e xuntas

 

O noso centro continúa a participar un curso máis no Programa Vixía, unha iniciativa impulsada pola Consellería de Sanidade orientada á prevención e á promoción do benestar na adolescencia. A través desta proposta, o alumnado ten a oportunidade de reflexionar sobre aspectos clave do seu desenvolvemento persoal e social da man de profesionais especializados.

Nesta ocasión, o alumnado de 1º de ESO participou nunha sesión dinamizada por Félix, educador social do programa. Máis que unha charla expositiva, a actividade desenvolveuse a través dun círculo de diálogo, no que cada alumno e alumna puido expresar sentimentos, inquietudes e reflexións nun espazo seguro e respectuoso.

De maneira previa á sesión, a orientadora do centro acudiu ás aulas para realizar unha actividade preparatoria. Nela presentouse a temática que se ía abordar desde o Programa Vixía e o alumnado tivo a oportunidade de formular, de xeito anónimo, preguntas dirixidas a Félix sobre as súas relacións interpersoais, preocupacións propias da adolescencia e outras cuestións que lles resultan significativas no seu día a día. Estas achegas serviron como punto de partida para o diálogo posterior, favorecendo unha participación máis auténtica e próxima á realidade do grupo.

A sesión puxo o foco na educación emocional, nas relacións cos iguais e na importancia do respecto e da escoita activa, ofrecendo ferramentas que contribúen ao benestar persoal e á convivencia positiva no centro.

A participación neste tipo de iniciativas continúa a reforzar o compromiso da nosa comunidade educativa cunha formación integral, na que aprender tamén significa coñecerse mellor, expresar o que sentimos e construír relacións máis saudables.

Gañadores/as das casiñas do nadal 2025

    A participación no noso concurso de casiñas de Nadal foi, unha vez máis, simplemente incrible. Recibimos 32 casiñas feitas con moito agarimo, imaxinación e creatividade, que encheron o noso centro de cor, ilusión e ambiente de Nadal.

    Queremos destacar tamén a grande implicación da comunidade educativa: 217 votacións que amosan o interese, o apoio e o entusiasmo de familias, alumnado e profesorado. Escoller non foi nada doado, porque todas as creacións merecían un recoñecemento polo seu esforzo e orixinalidade.

Xa temos, por fin, as casiñas gañadoras nas distintas etapas educativas 

Hoxe realizarase a entrega de premios, nun acto que servirá tamén para agradecer a participación de todo o alumnado e das súas familias.

Grazas, de corazón, por facer posible esta iniciativa un ano máis. 

O Nadal no noso cole constrúese así: con creatividade, ilusión compartida e moito traballo en equipo